Aktiv+ ETF, Aarau, 20. – 23. Juni 2019

Ds ETF 2019 in Aarau isch scho wider Gschicht, aber es het es paar gueti Gschichte gschribe für Aktiv+: vo erreichte Ziel, vom Ueli und em Oli sine Wunderchügeli wo so Mänge und Mängi froh isch gsi drum. Nach dr Akunft in Aarau hets no grad glängt ds Gepäck i de verschidene Unterkünft abdsgä und scho hei mir üs ufem Feschtgländ besammlet und si ga iturne. Es het immer mau wider grägnet aber dr Tom het immer gseit «es hört uf – ufem Rägeradar isch nüt meh» und er het de schlussamänd ou rächt gha: Mir si troche i Wettkampgf gstartet und ou die andere Wettkampfteile hei mir troche chönne dürezie. Derzwüsche si es paar Gwitter verbi zoge, aber bi üs hets nume chli dr gliche ta mit rägne.
Fuessball-Korb isch die ersti Disziplin gsi – nid für aui e Lieblingsdiszipin. Dr erst Ball vom Stephan isch de ou a Pfoste und woni ne wider zrächt büschelet ha gha hani mir bim umegä fasch dr Fuess broche – läck isch dä cheibe Ball hert pumpet gsi. Aber mir si dürche cho, Chörb hei mir fasch aui gmacht und d’Punkt hei de doch nid eso schlächt usgseh. Nachem Ballkreuz isch klar gsi: Mir si uf Kurs! Füre zwöit Teu hei mir üse Kampfspruch chli zueversichtlecher usegrüeft: «Was mache mer?» «Siebenezwänzg!» Unihockey und 8er-Ball si guet gloffe, es hätt aber no chli Steigerigspotenzial gha. Aber ou da hets glängt für über nes 9ni ds cho. Im letschte Teu isch de mini «Liblingsdiszipin» cho: Dr Moosgummiring. Läck bini gsecklet, aber dr Tom het mi glich no müesse überhole (nächscht Jahr sött de mini Kondition chli besser si). Im Intercross hei mir gloubs no nie söfu viu Bäll la gheie – und das bim churze Wurf, nid öppe bim länge. So hei mir no einisch chli zitteret, si aber im Gsammte uf nes guets Resultat cho. Ds SMS mit dr definitive Note hätt nach zwe Stund söue iträffe – es sich du e chli lenger gange, drum si mir fangs mau is Bier. Für die wos Wunder nimmt: am sächs ab sächsi isch das SMS de cho – mir heis nachem Dusche erfahre: 27.27 hets gä. Vou erfüllt *freu* und mir si mit super Lune ga Znacht ässe. Wobi; das cha natürlech ou wäge däm Bier gsi si….
Es het äbe du de es paar Bier gä – äbä wüu mir hei müesse ufd Note warte. U de si mir ouno id Feschtchartekontrolle cho. Wo dä elter Herr im Hälfer-T-Shirt uf üse Tisch zuegstüret het hei mir zersch no gmeint d Brigitt müess es Interview gä. Aber dr Ueli het aui Feschtcharte wöue gseh und aui gnau kontrolliert. «Dr Ueli hets scho gmacht» chönne mir säge, wenns no mau e Kontrolle git und de isch er zum nächste Verein. Wo dr Fredy het wöue ga Bier hole het er zersch mau müesse ds Fässli wächsle, das hei d Dame hinterem Trese nid säuber chönne – aber charmant wie dr Fredy isch het er das natürlech gärn überno. Ig ha jedes mau es Fläschli Öpfuschorle übercho: «D Irene isch e Fläsche – ääh.. berchunnt d Fläsche». Zwe Liter Schorle hei du es zimlichs Dräi im Buch gä. Guet het dr Oli siner Wunderchügeli parat gha. Sig zwar für «Intoxication» (chli ds viu trunke ha) aber mir hets ou ghufe und aune andere ou vor auem dene wo am nächste Tag früeh use hei müesse für ga ds Kampfrichtere. Anderi Würkige lö mer jetz mau la si, die si erfunde und nid ganz Jugendfrei. Dr Ueli isch ou no einisch verbi cho und het üs das mau grad es Bier spändiert. Lustig isches gsi mit em Ueli und mir hei no lang glachet. D Wingman Strategie* isch usfüehrlech erlüteret worde, wüu dr Andi und dr Tom zertifiziert si nach ISO 2006 (sex). Dr Bewis si si üs aber schwach blibe, si ja schliesslech beidi unger dr Hube.
Nach em Cher im Hotel hei mir üs mit de Aktive zum Apéro und troffe und si när ga Znacht ässe. D Festcharteverpflegig isch no lenger diskutiert worde, no hüt si nid aui sicher ob das jetzt Polenta isch gsi oder nid. Ds Poulet isch uf jede Fau so troche gsi, das mir churzerhand, nachem Znacht no si ga Znacht ässe. Mir hei üs überall chli verteut ir Frässmeile, wo ire Allee ufbout und richtig gmüetlech belüchtet isch gsi mit viune Liechterchettine. Irgendeinisch hei mir üs aui wieder im Barstreet-Zäut troffe und es isch für die Einti oder dr Anger doch e chli spät worde. Mir hei tanzet und gsunge und s’luschtig gha. Es glungnigs Fescht.
Über die nächste Täg si es paari hei, anderi si im Isatz gstange (Merci Brige und Sändle) und am Samstig Abe het sech es chlises Grüppli no ir Altstadt zum Znacht igfunde. Ds Festgländ isch a jedem Abe chli voller worde und nach 45 Minute astah für nes Bier (und när hets nidemau meh Pitcher gä und bar zahle het me ou müesse) si mir «Aute» no gmüetlech i «Wybronne» ga ne Fläsche Wy vernichte (oder ou zwe). Agstannge si mer dört nume öppe 5 Minute. Es gub no viu ds Brichte vo däm Fescht und es wird üs i gueter Erinnerig blibe. Es paar Müsterli hani no, wärs gnauer wott wüsse redt am Beste mit öpperem vo Aktiv +:

Ueli: «D häufti vo de Froue hei dr Uswis im BH. BHs über 76 längeni nid a.»
Ueli zu Röfe: «Du masch nid emau noche mit dere, was wotsch de mit zwene?
Metty zu Fredy: «Mi dünkt du heigisch scho chli es Zötteli ar Zunge».
Tom, am Sunntigmorge: «Mi Zimmerschlüssu isch anderwitig beschäftigt gsi»
Claudi: «Daniela gömer go bisle? Ig nime ds Portmonnai mit.» Urs: «Bisle isch ir Feschtcharte inbegriffe»

*Wingman Strategie: Der Wingman spricht die unattraktive Frau an, damit der andere sich mit der Hübschen unterhalten kann.

Irene Zimmermann